सुडान । गृहयुद्धले ग्रस्त सुडानमा भारतको ओढिसा राज्यका ३६ वर्षीय आदर्श बेहरालाई र्‍यापिड सपोर्ट फोर्स (आरएसएफ) नामक समूहले बन्धक बनाएको छ । यो घटना अक्टोबर २६ मा अल–फसेर शहरमा आरएसएफले नियन्त्रण लिएपछि भएको हो ।

आदर्शको परिवारले भारत सरकार र बलिउड अभिनेता शाहरुख खानलाई उनको सुरक्षित रिहाइका लागि अपिल गरेका छन् । सार्वजनिक गरिएको भिडियोमा अपहरणकारीले आदर्शलाई शाहरुख खानबारे सोधपुछ गरेको देखिन्छ, जसका कारण परिवारले अनुमान गरेको छ कि अपहरणकारीहरू शाहरुखका प्रशंसक हुन सक्छन् ।

आदर्शकी श्रीमती सुष्मिताको भनाइअनुसार, “यदि शाहरुख खानले अपिल गर्नुभयो भने, मेरो श्रीमान् रिहा हुन सक्नुहुन्छ।” जगतसिंहपुर जिल्लाको कोटाकाना गाउँका आदर्श आर्थिक कठिनाइका कारण २०२२ मा सुडान गएका थिए । ‘सुक्रती प्लास्टिक कारखाना’मा मेसिन अपरेटरका रूपमा कार्यरत उनी त्यहाँ राम्रो आम्दानीको आशामा पुगेका थिए ।

परिवारमा उनकी श्रीमती, दुई छोरा र आमाबाबु रहेका छन् । आदर्शका बुबा खेत्रबासीका अनुसार सुरुवाती समयमा सरकारी सहयोग नपाए पनि अहिले ओडिशाका मुख्यमन्त्री मोहन चरण माझीले सुरक्षित फिर्तीका लागि पहल सुरु गरेको जनाएका छन् ।