डेनभर —कोलोराडोको अरोरा सहरबाट हराएकी १४ बर्सिया किशोरीको केसमा २६ वर्षीय एक पुरुष पक्राउ परेका छन् । केटीलाई अन्तिम पटक गत जुन १४ देखिएको थियो । उनी हराएको खबर पुलिसले जुन १९, बिहीबार सामाजिक सञ्जालमा प्रकाशित गरेको थियो ।

जुन २३ मा, केटीको परिवारले उनको खोजीका लागि जानकारी दिनेलाई इनाम दिने घोषणा गरेका थिए । यसैबिच कानुन प्रवर्तन निकायले एफबिआई, गृह रक्षा विभाग र राष्ट्रिय गुमाइएका तथा शोषित बालबालिका केन्द्रसँग मिलेर खोजी अभियान चलाएको थियो ।

बुधवार, अरोरा पुलिस विभागले ग्रान्ड काउन्टी शेरिफ कार्यालय, एफबिआई डेनभर, गृह रक्षा डेनभर र क्रेम्लिङ पुलिस विभागले २६ वर्षीय एक पुरुषलाई संलग्न ठहर गरी हिरासतमा लिएको बतायो । अरोरा पुलिसले स्पष्ट पारे अनुसार केटी क्रेम्लिङमा उक्त पुरुषसँग थिइनन् तर अनुसन्धानकर्ताहरूले खोजीका क्रममा उक्त व्यक्तिसँग सम्पर्क गरेका थिए ।

पुलिसका अनुसार, उक्त पुरुषले अनुसन्धानकर्ताहरूलाई केटी लास भेगासमा भएको जानकारी दिएको थियो । बुधवार राति ८ बजे अरोरा पुलिसले पक्राउ परेको व्यक्तिलाई क्रिस्चियन विलियमसन (२६ वर्ष) को रूपमा पहिचान गर्‍यो । उनलाई ग्रान्ड काउन्टी शेरिफ कार्यालय जेलमा राखिएको छ । उनमाथि बालबालिकालाई इन्टरनेट मार्फत फसाउने, बालबालिकाको यौन शोषण गर्न इन्टरनेट प्रयोग गर्ने आरोप लगाएको छ ।

एफबिआई लास भेगास र लास भेगास मेट्रो पुलिस विभागको सहयोगमा केटीलाई सुरक्षित फेला पारिएको छ । पुलिसका अनुसार, विलियमसन र केटी केही महिनादेखि सम्बन्धमा थिए । साथै, अरोरा पुलिसले लास भेगास कानुन प्रवर्तन निकायसँग मिलेर नेभादामा सम्भावित अर्को संलग्न व्यक्तिको खोजी र केटीलाई घर फिर्ता ल्याउने प्रयास गरिरहेको छ।