पेशावर, पाकिस्तानको उत्तर-पश्चिम भागमा पूर्व-मनसुन वर्षाको कारण आएको बाढीले धेरै पर्यटकहरूलाई बगाएर लग्यो । यस घटनामा कम्तीमा ८ जनाको मृत्यु भएको छ ।

अधिकारीहरूका अनुसार, स्वात नदी किनार पिकनिक मनाउँदै गरेका पर्यटकहरू बाढीले बगाएपछि १०० जति उद्धारकर्मीहरूले ५८ जनालाई बचाएका छन् । प्रान्तीय आपतकालीन सेवाका प्रवक्ता शाह फहादले भने, “१६ जना एकै परिवारका सदस्यहरू हराएका छन् । ”

उनले बताए कि गोताखोरहरूले धेरै समयको प्रयासपछि ८ जनाको शव बरामद गरेका छन् र १० जनाको खोजी जारी छ । सोसल मिडियामा सारिएका भिडियोहरूमा स्वात नदीको बिचमा फसेका धेरै जनालाई बाढीको पानी बढ्दै जाँदा मद्दतको लागि चिच्याउँदै देखिन्छ ।

फहादले स्वात उपत्यका (जुन हजारौँ पर्यटकहरूको लोकप्रिय गन्तव्य हो) बग्ने स्वात नदीमा बाढी आउन सक्ने सरकारी चेतावनीलाई गम्भीरतापूर्वक पालना गर्न जनतालाई आग्रह गरे । मौसम विज्ञहरूले यो हप्ता पनि वर्षा जारी रहने बताएका छन्। पाकिस्तानको वार्षिक मनसुन जुलाईदेखि सेप्टेम्बरसम्म रहन्छ ।

प्रधानमन्त्री शहबाज शरीफले स्वात नदीमा बाढीले बगाएका पर्यटकहरूको मृत्युमा गहिरो शोक व्यक्त गरे । उनले नदी र खोल्साको नजिक सुरक्षा उपायहरू बढाउन अधिकारीहरूलाई निर्देशन दिए ।

यस हप्तादेखि पाकिस्तानको केही भागमा भारी वर्षाले राजमार्ग अवरुद्ध गरेको छ र घरहरू क्षतिग्रस्त भएका छन् । तर, २०२२ को तुलनामा यस पटक कम वर्षा हुने मौसम विज्ञहरूले अनुमान गरेका छन् । २०२२ मा बाढीले पाकिस्तानको एक तिहाइ भाग डुबाएको थियो र १,७३९ जनाको मृत्यु भएको थियो।