काठमाडौँ । अमेरिकामा रहेका नेपाली वैज्ञानिक डा. गणेश चन्दलाई अल्जाइमर रोगसम्बन्धी महत्त्वपूर्ण अनुसन्धानका लागि ३२ लाख डलर (करिब ४३ करोड रुपैयाँ) को ठुलो अनुदान प्राप्त भएको छ। यो अनुसन्धानले अल्जाइमरका बिरामीमा देखिने मानसिक समस्याहरूको कारण पत्ता लगाउन मद्दत गर्नेछ।

के हो अनुसन्धानको लक्ष्य ?
अल्जाइमर रोगले व्यक्तिको स्मरणशक्ति कमजोर बनाउने सबैलाई थाहा छ, तर कतिपय बिरामीमा रिस, उदासी र डरजस्ता मानसिक समस्या पनि देखिन्छन्। यी समस्या किन र कसरी आउँछन् भन्ने कुरा अझै रहस्यमय छ। डा. चन्दको टोलीले यही कुराको वैज्ञानिक कारण खोज्नेछ।

मिजौरी राज्यको सेन्ट लुइसमा बसोबास गर्दै आएका डा. चन्द र उनको टोलीले कृत्रिम बौद्धिकता (एआई) को प्रयोग गरेर अल्जाइमरका बिरामीको मस्तिष्क स्क्यान (एमआरआई र पीईटी) र व्यवहारको गहिरो अध्ययन गर्नेछन्। यसले अल्जाइमर रोगले मानिसको व्यवहारमा कसरी परिवर्तन ल्याउँछ भन्ने कुरा बुझ्न सहयोग पुग्नेछ।

अनुसन्धानको महत्त्व
अल्जाइमर रोग हाल अमेरिकामा मृत्युको सातौँ प्रमुख कारण हो। यो रोगले बिरामीको जीवनलाई मात्र होइन, उनीहरूको हेरचाह गर्ने परिवार र चिकित्सकलाई पनि ठुलो चुनौती दिन्छ। यदि यो अनुसन्धान सफल भएमा बिरामीको सही उपचार गर्न र उनीहरूको मानसिक स्वास्थ्यलाई राम्रो बनाउन नयाँ बाटो खुल्नेछ।

**वाशयू मेडिसिन, म्यालिनक्रोट इन्स्टिच्युट अफ रेडियोलोजी (एमआईआर)**का सहायक प्राध्यापक डा. चन्दले अमेरिकाको नेसनल इन्सटिट्युड अफ हेल्थ (NIH) बाट चार वर्षका लागि यो अनुदान पाएका हुन्। उनी र उनको टोलीले अल्जाइमरको मानसिक समस्याको वास्तविक कारण पत्ता लगाई भविष्यमा बिरामीको निदान र उपचार पद्धतिलाई अझ राम्रो बनाउने लक्ष्य लिएका छन् ।