गाजा, अजरबैजान । संयुक्त राष्ट्रसंघको संस्था युएनआरडब्लुएले गाजामा काम गर्ने आफ्ना केही कर्मचारीहरू भोकमरीको पीडा भोगिरहेको बताएको छ। संस्थाले गाजामा “भोकले गर्दा गम्भीर पीडा भइरहेको” भन्ने दुःखद सन्देशहरू आएको जनाएको छ।

गाजामा २० लाखभन्दा बढी मानिसहरू खानाको गम्भीर समस्यामा परेका छन्। डाक्टरहरू, नागरिक सुरक्षाकर्मी र अन्य सहायता संस्थाहरूले कुपोषण बढ्दै गएको बताएका छन्।

युएनआरडब्लुएले भनेको छ, “गाजामा खाद्यान्नको अभावले गर्दा खानाको मूल्य ४० गुणा बढिसकेको छ। तर, गाजा बाहिर हाम्रो गोदाममा तीन महिनासम्म सबैलाई पुग्ने खाद्य सामग्री छ।”

संस्थाले भनेको छ, “गाजामा भएको यो पीडा मानिसले बनाएको हो। यो रोकिनुपर्छ। नाकाबन्दी हटाउनुपर्छ र सहयोग सामग्री सजिलै गाजामा पुग्ने बाटो खोल्नुपर्छ।”

इजरायले गत चैतमा गाजामा पूर्ण नाकाबन्दी लगाएको थियो। दुई महिनासम्म कुनै सामान नछिर्न दिँदा पछि केही ट्रकहरू मात्र गाजामा पसेका थिए।

नागरिक सुरक्षा निकायले गत साता “गम्भीर भोकमरी र कुपोषण” का कारण ३ बच्चाको मृत्यु भएको जनाएको छ। स्वास्थ्य मन्त्रालयले भने एक दिनमै भोकमरीले १८ जनाको ज्यान लिएको बताएको छ।

अल-शिफा अस्पतालका डाक्टर मोहम्मद अबु सलमियाले भनेका छन्, “एक वर्षमुनिका बच्चाहरूलाई दूध नपुगेपछि उनीहरूको तौल घट्दै गएको छ। यसले गर्दा उनीहरूको रोग प्रतिरोधक शक्ति कम भएर धेरै बिरामी पर्दै छन्।”

इजरायलले भने गाजामा बच्चाहरूका लागि दूध र खाद्य सामग्री पठाउनमा कुनै रोक नभएको बताएको छ। इजरायली सरकारले २००० टनभन्दा बढी बच्चाको खाना पठाइसकेको दाबी गरेको छ।

२०२३ मा हमासले आक्रमण गरेपछि इजरायलले युद्ध सुरु गरेको थियो। इजरायली तथ्याङ्कअनुसार १२१९ जनाको मृत्यु भएको थियो। गाजाको स्वास्थ्य मन्त्रालयका अनुसार, इजरायली सैनिक कारबाहीमा ५९ हजारभन्दा बढी मानिसहरू मारिएका छन्, जसमा धेरैजना सामान्य नागरिक हुन्।

Photo: Google