डेनभर | संयुक्त राज्य अमेरिकाको इतिहासमा सबैभन्दा लामो फेडरल सरकार बन्द भएको अन्त्यसँगै कोलोराडोमा ‘सप्लिमेन्टल न्युट्रिशन असिस्टेन्स प्रोग्राम’ (SNAP) अन्तर्गतका खाद्य सहायता सेवा पुनः सञ्चालनमा आएका छन् ।

राष्ट्रपति हस्ताक्षरपछि सरकारी सेवाहरू क्रमशः सुचारु हुँदै गर्दा, कोलोराडोमा मानव सेवा विभागले SNAP लाभग्राहीहरूले केही दिनमै आफ्नो सहायता रकम कार्डमा प्राप्त गर्ने जनाएको छ।

विभागकी कार्यकारी निर्देशक मिशेल बार्न्सका अनुसार, धेरै लाभग्राहीहरूले पहिले नै कार्डमा रकम पाउन थालेका छन्। उनले भनिन्, “हामीले फेडरल स्वीकृति मिल्नेबित्तिकै रातारात लाभ लोड गर्न थालेका थियौं। धेरै लाभग्राहीले पहिले नै प्राप्त गरिसकेका छन् र हामी आशा गर्छौं सबैले व्यवसायिक समय समाप्त हुनुअघि आफ्नो लाभ प्राप्त गर्नेछन्।”

बार्न्सले SNAP लाभ वितरणमा देखिएको अवरोध आफ्नो करियरको सबैभन्दा चुनौतीपूर्ण अनुभव भएको बताइन्। तर राज्य सरकार, विभिन्न एजेन्सीहरू र राज्यपालको कार्यालयबीचको सहकार्यका कारण सेवा छिटो सुचारु गर्न सफल भएको उनले बताइन्।

“हामी सबैको साझा लक्ष्य एउटै हो — मानिसहरूलाई खाद्य सहायता उपलब्ध गराउने र कसैलाई भोकै बस्न नदिने,” बार्न्सले भनिन्। “सरकारी बन्दको विवाद यसरी हुन नहुने हो।”

त्यसैबीच, खाद्य सहायता उपलब्ध गराउने संगठनहरूले अझै पनि माग उच्च रहेको बताएका छन्। ‘फुड रेस्क्यु यूएस – डेनभर’ की स्वयंसेवक जेसका अनुसार, पछिल्ला हप्ताहरूमा खाद्य वितरणमा समस्या देखिएको छ, तर डेनभरका विभिन्न फुड रेस्क्यु समूहहरूले नष्ट हुन लागेको खाना बचाएर आवश्यकता भएका मानिसहरूलाई वितरण गर्न सहयोग गरिरहेका छन्।

राज्यले संयुक्त बजेट समितिबाट स्वीकृत १ करोड डलरमध्ये हालसम्म ५० लाख डलर खाद्य बैंकहरूलाई सहयोगस्वरूप वितरण गरिसकेको छ।

यसैक्रममा, डेनभरमा नयाँ संस्था ‘फुड रेस्क्यु यूएस’ ले स्थानीय रेस्टुरेन्ट तथा व्यवसायहरूसँग सहकार्य गर्दै खाना नष्ट हुनबाट जोगाउने अभियान सुरु गरेको छ। यी संस्थाका प्रतिनिधि साराहका अनुसार, “फुड रेस्क्यु एप डाउनलोड गरेपछि तीन मिनेटमै प्रशिक्षण लिएर स्वयंसेवक बन्न सकिन्छ। इच्छाअनुसार धेरै वा थोरै खाद्य वितरणमा सहभागी हुन सकिन्छ।”

राज्य अधिकारीहरूले यस पर्वको मौसममा स्थानीय फुड बैंक वा प्यान्ट्रीहरूलाई सहयोग गर्न नागरिकहरूलाई आग्रह गरेका छन्।

बार्न्सले भनिन्, “यो समय तपाईंको स्थानीय फुड बैंकलाई सहयोग गर्ने उत्कृष्ट अवसर हो। स्वयंसेवक बन्नुहोस् वा नगद सहयोग दिनुहोस्। SNAP लाभ वितरणमा १३ दिन ढिलाइ भएपछि अधिकांश फुड बैंकका र्याकहरू खाली भएका छन्।”