अष्ट्रेलिया । अष्ट्रेलियाको चर्चित फेसन ब्रान्ड Runaway The Label का संस्थापक तथा प्रमुख कार्यकारी अधिकृत प्रेमल पटेलको ४७ वर्षको उमेरमा आइतबार अचानक निधन भएको छ। स्वास्थ्य जटिलताका कारण करिब एक महिनाअघि अस्पताल भर्ना भएका पटेलको उपचारकै क्रममा मृत्यु भएको हो। उनको निधनले अष्ट्रेलियाली फेसन उद्योगसहित प्रशंसक र शुभेच्छुकहरूलाई गहिरो शोकमा डुबाएको छ।

ब्रान्डको आधिकारिक सामाजिक सञ्जालमार्फत जारी विज्ञप्तिमा प्रेमल पटेलको स्पष्ट दृष्टिकोण, मूल्य र सशक्त नेतृत्वले Runaway The Label को पहिचान निर्माण गरेको उल्लेख गरिएको छ। विज्ञप्तिमा भनिएको छ, “उनले सिर्जना गरेको विरासत सधैं जीवित रहनेछ, तर उनको अनुपस्थितिले संसार अलिकति उज्यालो कम भएको महसुस भएको छ।”

प्रेमलको परिवारले यो दुःखद घडीमा निजी जीवनको सम्मान गर्न आग्रह गरेको छ। साथै, उनको जीवन, योगदान र सिर्जनात्मक यात्राको सम्मानस्वरूप स्मृति कार्यक्रम आयोजना गर्ने तयारी भइरहेको जनाइएको छ।

उनको निधनप्रति फेसन, मनोरञ्जन तथा सामाजिक सञ्जाल क्षेत्रका थुप्रै चर्चित व्यक्तित्वहरूले शोक व्यक्त गरेका छन्। सहकर्मी र शुभेच्छुकहरूले प्रेमललाई दयालु, दुरदर्शी र प्रेरणादायी व्यक्तित्वका रूपमा सम्झिएका छन्।

निधन हुनुभन्दा केही समयअघि प्रेमल पटेलले आफू भ्यापिङका कारण गम्भीर स्वास्थ्य संकटमा परेको खुलासा गरेका थिए। उनले सामाजिक सञ्जालमा आईसीयूमा उपचाररत अवस्थाको तस्बिर सार्वजनिक गर्दै फोक्सोमा भ्यापको तरल पदार्थ जमेकाले अक्सिजनको स्तर खतरनाक रूपमा घटेको बताएका थिए। पटक–पटक अस्पताल भर्ना भएपछि उनलाई अन्ततः कृत्रिम कोमामा राखिएको थियो।

स्वास्थ्य अवस्था सुधारिएपछि प्रेमलले भ्यापिङ गर्नेहरूलाई कडा चेतावनी दिँदै यसलाई “जीवनसँगको जुवा” भनेका थिए। आफूले नियन्त्रणमा ठानेको बानी नै जीवनको सबैभन्दा कठिन संघर्ष बनेको उनको भनाइ थियो।

प्रेमल पटेलको असामयिक निधनले भ्यापिङको जोखिमबारे गम्भीर प्रश्न उठाएको छ। स्वास्थ्य विज्ञहरूले पनि भ्यापिङलाई सुरक्षित विकल्प ठान्ने भ्रमबाट सचेत रहन आग्रह गर्दै आएका छन्। फेसन उद्योगमा छुट्टै पहिचान बनाएका प्रेमलको योगदान सधैं सम्झनामा रहनेछ ।