डेनभर । अमेरिकाको कोलोराडो राज्यस्थित डेनभर अन्तर्राष्ट्रिय विमानस्थल (DIA) मा एसियन अमेरिकन तथा प्यासिफिक आइल्याण्डर (AAPI) हेरिटेज मन्थ अर्थात् महिनाको अवसरमा नेपाली समुदायको संस्कृति र पहिचान झल्काउने विशेष प्रदर्शनी सुरु गरिएको छ ।

“हेरिटेज इन मोशन” नाम दिइएको उक्त प्रदर्शनीमार्फत हिमालयदेखि रकी पर्वतसम्म नेपाली संस्कृतिको यात्रा र प्रभावलाई प्रस्तुत गरिएको छ । प्रदर्शनीमा ३० भन्दा बढी सांस्कृतिक सामग्री, परम्परागत वस्तु तथा नेपाली समुदायको इतिहास र पहिचानसँग सम्बन्धित सामग्री राखिएको छ ।

प्रदर्शनीले नेपालबाट अमेरिका पुगेको नेपाली समुदायले आफ्नो भाषा, संस्कृति, परम्परा र जीवनशैलीलाई कसरी पुस्तान्तरण गर्दै जोगाइरहेको छ भन्ने विषयलाई मुख्य रूपमा उजागर गरेको छ । यसमा नेपाली कला, पोसाक, हस्तकला, धार्मिक तथा सांस्कृतिक परम्परासँग सम्बन्धित वस्तु समावेश गरिएको जनाइएको छ ।

डेनभर क्षेत्रमा बसोबास गर्ने नेपाली समुदायको सक्रिय सहभागितामा तयार गरिएको यो प्रदर्शनीले नेपाली संस्कृतिलाई अन्तर्राष्ट्रिय दर्शकमाझ चिनाउने अवसर प्रदान गरेको छ । अमेरिकाको चौथो ठुलो विमानस्थल डेनभर अन्तर्राष्ट्रिय बिमानस्थल (DIA) जस्तो विश्वभरका यात्रु आवतजावत गर्ने स्थानमा नेपाली पहिचान प्रस्तुत हुनु समुदायका लागि गर्वको विषय बनेको छ ।

प्रदर्शनी डेनभर अन्तर्राष्ट्रिय विमानस्थलको कन्कोर्स ‘सी’ अर्थात् गेट सिको माथिल्लो तहमा राखिएको छ। एस्कलेटरबाट माथि जाँदा यो देखिन्छ दोस्रो तलामा । यो आगामी अगस्ट १०, २०२६ सम्म सर्वसाधारणका लागि अवलोकन गर्न खुला रहनेछ ।

AAPI हेरिटेज महिना (मन्थ) हरेक वर्ष मे महिनामा मनाइन्छ । यस अवसरमा अमेरिकाभर विभिन्न एशियाली तथा प्यासिफिक समुदायको इतिहास, योगदान र सांस्कृतिक विविधतालाई सम्मान गर्दै विभिन्न कार्यक्रम आयोजना गरिन्छ । नेपाली समुदायको सहभागितासहितको “हेरिटेज इन मोशन” प्रदर्शनीलाई पनि यही अभियानअन्तर्गत महत्वपुर्ण सांस्कृतिक पहलका रूपमा हेरिएको छ ।