लन्डन। विगत झन्डै दुई दशकदेखि लन्डनमा उत्कृष्ट नेपाली तथा इन्डियन खानाका लागि परिचित ‘होली काउ’ समूहद्वारा सञ्चालित एक फाइन डाइन रेस्टुरेन्टले ‘बेस्ट रेस्टुरेन्ट’ को प्रतिष्ठित अवार्ड जितेको छ ।

आइतबार साँझ रेडिंगमा आयोजित ‘इंग्ल्यान्ड्स बिजनेस अवार्ड्स २०२५’ मा यो पुरस्कारको घोषणा गरिएको हो ।

पुरस्कारको आधार: आयोजकका अनुसार विजेताहरूको छनोट मतदाताहरूले गरेको भोट, कम्पनीले तिरेको कर, कर्मचारी संख्या र समुदायमा पुर्‍याएको योगदान लगायतका आधारमा गरिएको थियो ।

इङ्गल्यान्डभरका रेस्टुरेन्टहरूबिच भएको यो कडा प्रतिस्पर्द्धामा हजारौँ ग्राहक र समर्थकले आफूलाई मन पर्ने व्यवसायको पक्षमा भोट दिएका थिए ।

नेपाली उद्यमशीलताको गौरव: होली काउ ग्रुपका अध्यक्ष कुल आचार्य ले यो अवार्डले नेपाली उद्यमशीलता र आतिथ्य सत्कारलाई अन्तर्राष्ट्रिय स्तरमा थप उजागर गरेको बताएका छन् । यो उपलब्धि नेपाली समुदायको गौरव मात्र नभई गुणस्तरीय सेवा र स्वादका माध्यमबाट बेलायतमा स्थापित नेपाली पहिचानको प्रमाण बनेको उनको भनाइ छ ।

आचार्यले यो सफलताबाट आफूहरू अत्यन्तै उत्साहित भएको बताउँदै यो यात्रामा साथ, स्नेह र भोटद्वारा सहयोग गर्ने सबै मित्र, शुभेच्छुक तथा सहयोगीहरूलाई हार्दिक धन्यवाद दिएका छन् ।

झन्डै २० वर्षअघि स्थापना भएको होली काउ समूह अन्तर्गतका रेस्टुरेन्ट तथा टेक अवेहरूमा हाल करिब १२० जना कर्मचारीहरू कार्यरत छन् ।