मुम्बई । बलिउड अभिनेता टाइगर श्रफको कारमाथि आइतबार साँझ मुम्बईको जुहु क्षेत्रमा गोली प्रहार भएको घटना सार्वजनिक भएको छ । घटनामा अभिनेता टाइगर श्रफलाई कुनै चोटपटक नलागेको बताइएको छ ।

वरिष्ठ अभिनेता ज्याकी श्रफका छोरा टाइगर बलिउडमा एक्सन, मार्सल आर्ट्स र नृत्यका लागि परिचित छन्। उनको वास्तविक नाम जय हेमन्त श्रफ हो। तर, चलचित्र क्षेत्रमा उनी ‘टाइगर श्रफ’ नामले चर्चित छन्। उनको नाम कसरी टाइगर रहन गयो भन्ने कथा पनि निकै रोचक छ।

जय हेमन्तबाट बने ‘टाइगर’
टाइगर श्रफले केही वर्षअघि ‘कर्ली टेल्स’लाई दिएको एक अन्तर्वार्तामा आफ्नो वास्तविक नाम र ‘टाइगर’ नाम रहनुको कारण खुलाएका थिए ।

उनका अनुसार उनको वास्तविक नाम जय हेमन्त श्रफ हो। उनका बुबाको नाम जयकिशन हो, जो पछि चलचित्र क्षेत्रमा ज्याकी श्रफका नामले चर्चित भए । त्यस्तै, उनका काकाको नाम हेमन्त श्रफ भएकाले उनको नाम जय हेमन्त राखिएको थियो ।

टाइगरले बाल्यकालमा आफूलाई मन पर्ने मानिसहरूसँग माया व्यक्त गर्दा वा भेट्दा उनीहरूलाई टोक्ने बानी रहेको बताएका थिए। बाल्यकालमा मानिसहरूलाई टोकिरहने उनको यही बानीका कारण परिवारका सदस्य तथा वरपरका मानिसहरूले उनलाई ‘टाइगर’ भन्न थालेका थिए।

समयसँगै ‘टाइगर’ नाम नै उनको पहिचान बन्यो। पछि चलचित्र क्षेत्रमा प्रवेश गर्दा पनि उनले यही नामलाई आफ्नो कलाकारको नामका रूपमा अपनाए। अहिले उनी यही नामबाट बलिउडमा परिचित छन्।

‘हिरोपन्ती’बाट बलिउडमा प्रवेश
टाइगर श्रफले सन् २०१४ मा प्रदर्शन भएको चलचित्र ‘हिरोपन्ती’बाट बलिउडमा अभिनय यात्रा सुरु गरेका थिए। पहिलो चलचित्रबाटै उनले एक्सन र नृत्यमा आफ्नो क्षमता प्रस्तुत गरेका थिए।

डेब्यु चलचित्रपछि उनले ‘बागी’, ‘अ फ्लाइङ जट्ट’, ‘मुन्ना माइकल’, ‘स्टुडेन्ट अफ द इयर २’, ‘वार’ र ‘बढे मियाँ छोटे मियाँ’ लगायतका चलचित्रमा अभिनय गरेका छन्।

उनको ‘बागी’ चलचित्र शृङ्खलाका विभिन्न भाग पनि प्रदर्शन भइसकेका छन्। विशेष गरी एक्सन प्रधान भूमिकामा देखिने टाइगरले आफ्नो शारीरिक क्षमता, स्टन्ट र मार्सल आर्ट्सका कारण दर्शकमाझ छुट्टै पहिचान बनाएका छन्।

मार्सल आर्ट्सलाई ध्यानजस्तै मान्छन् टाइगर
टाइगर श्रफको मार्सल आर्ट्सप्रतिको लगाव उनको अभिनय यात्राको महत्त्वपूर्ण पक्ष हो। उनले विभिन्न अन्तर्वार्ता तथा पोडकास्टमा मार्सल आर्ट्सले आफ्नो जीवनमा अनुशासन कायम गर्न ठुलो भूमिका खेलेको बताएका छन्।

उनका अनुसार मार्सल आर्ट्स उनका लागि शारीरिक अभ्यास मात्र नभई ध्यान गरेजस्तै अनुभव हो। यसले उनलाई एकाग्रता, आत्म नियन्त्रण र अनुशासन सिकाएको छ।

बाल्यकालमै मार्सल आर्ट्सप्रति आकर्षित भएका टाइगरले टेलिभिजनमा ब्रुस लीको चर्चित चलचित्र ‘इन्टर द ड्रागन’ हेरेपछि आफू पनि त्यस्तै बन्न चाहेको बताएका थिए।

उनले उक्त चलचित्र हेरेपछि आफ्ना आमाबुबासँग आफूलाई पनि ब्रुस ली जस्तै बन्न मन लागेको बताएका थिए। त्यसपछि उनका आमाबुबाले उनलाई कराँते कक्षामा भर्ना गरिदिएका थिए।

टाइगरका अनुसार उनले मार्सल आर्ट्सको अभ्यास सुरु गरेपछि त्यसलाई छिट्टै सिक्न थालेको महसुस गरेका थिए। यही रुचि र निरन्तर अभ्यासले पछि उनको चलचित्र करियरमा समेत महत्त्वपूर्ण भूमिका खेलेको देखिन्छ।

एक्सन र फिटनेसबाट छुट्टै पहिचान
बलिउडमा टाइगर श्रफलाई विशेष गरी कठिन स्टन्ट, मार्सल आर्ट्स, नृत्य र फिटनेसका लागि चिनिन्छ। अन्य कलाकारको तुलनामा शारीरिक अभ्यास र एक्सन दृश्यमा उनको विशेष रुचि देखिन्छ।

बाल्यकालमा राखिएको ‘टाइगर’ नामलाई नै व्यावसायिक पहिचान बनाएका उनले अहिले आफ्नो वास्तविक नामभन्दा कलाकारको नामबाट बढी लोकप्रियता हासिल गरेका छन्।

ज्याकी श्रफका छोराका रूपमा चलचित्र क्षेत्रमा प्रवेश गरेका टाइगरले आफ्नो एक्सन शैली र शारीरिक क्षमतामार्फत छुट्टै परिचय बनाएका छन्। उनको नामसँग जोडिएको बाल्यकालको रोचक प्रसङ्गले पनि उनको व्यक्तित्वको एउटा फरक पक्ष उजागर गर्छ।