अमेरिकाले ग्रिन कार्डसम्बन्धी नयाँ नीति घोषणा गरेपछि त्यहाँ बसोबास गरिरहेका लाखौँ आप्रवासी प्रभावित हुने भएका छन्। नयाँ व्यवस्थाअनुसार ग्रिन कार्ड प्राप्त गर्न चाहने अधिकांश आप्रवासीहरूले अब अमेरिका छाडेर आफ्नै देशस्थित अमेरिकी दूतावास वा वाणिज्य दूतावासमार्फत आवेदन दिनुपर्नेछ।

यूएस सिटिजनसिप एन्ड इमिग्रेसन सर्भिसेज (USCIS) ले शुक्रवार जारी गरेको सूचनामा “विशेष परिस्थितिबाहेक” स्टाटस परिवर्तन गर्न चाहने व्यक्तिहरूले अब विदेशस्थित कन्सुलर प्रक्रियामार्फत मात्रै आवेदन दिन सक्ने जनाएको छ। ट्रम्प प्रशासनले अवैध आप्रवासन नियन्त्रण गर्ने प्रयासअन्तर्गत यो कदम चालेको बताइएको छ। यसअघि अमेरिका भित्रै बसेर भिसाधारक तथा आगन्तुकहरूले ग्रिन कार्डका लागि आवेदन दिन सक्ने व्यवस्था थियो।

यस नीतिको आलोचना गर्दै कतिपयले पुरानो व्यवस्थाले आवेदन प्रक्रिया लामो हुँदा पनि परिवारलाई सँगै बस्न सहज बनाएको बताएका छन्। नयाँ नियमले भने लाखौँ आप्रवासीलाई अन्योलमा पार्न सक्ने र अमेरिका छाडेपछि पुनः फर्कन पाउने वा नपाउने चिन्ता बढाएको विश्लेषण गरिएको छ।

ग्रिन कार्डले अमेरिकामा स्थायी बसोबासको अनुमति दिन्छ। विज्ञहरूका अनुसार नयाँ नीतिको असर अमेरिकामा रहेका भारतीय समुदायमाथि पनि उल्लेखनीय रूपमा पर्नेछ। ग्रिन कार्डका लागि आवेदन दिनेहरूमा भारत र चीनका पेसागत कामदारहरूको संख्या अन्य देशको तुलनामा धेरै रहेको बताइएको छ।