बारा । बारामा एमालेको पुर्वनिर्धारित कार्यक्रममा स्थानीय युवाबाट अवरोध भएपछि राजनीतिक वृतमा तीव्र प्रतिक्रिया देखिएको छ । सिमरा विमानस्थल नजिक जेन–जी समुह र एमाले कार्यकर्ताबीच तनाव बढेपछि जिल्ला प्रशासनले दिउँसो १२:३० बजेदेखि बेलुका ८ बजेसम्म कर्फ्यु जारी गरेको हो ।

युवा सङ्घको ‘मधेश जागरण सभा’ सम्बोधनका लागि सिमरा हुँदै परवानीपुर जान लागेका एमाले महासचिव शंकर पोखरेल र नेता महेश बस्नेतको यात्रा हिंसा भड्किएपछि रोकिएको थियो। प्रशासनका अनुसार करिब १५० प्रदर्शनकारीले विमानस्थलबाहिर ढोका फुटाउने प्रयास गरेपछि सुरक्षा जोखिम बढेर कर्फ्यु लगाउनुपरेको हो ।

स्थिति सामान्य बन्दै गएको जनाउँदै प्रशासनले कर्फ्यु क्षेत्रमा ५०० मिटर भित्र आवतजावत पुर्ण रोक लगाएको छ। विमानस्थल अवरुद्ध भएपछि सिमराका आजका सबै उडान स्थगित भएका छन् ।

घटना राजनीतिक रूपमा संवेदनशील बन्दै गएकोछ। एमाले नेताहरूले सरकारले आफ्नो गतिविधि रोक्न खोजेको आरोप लगाएका छन् भने कांग्रेस नेताहरूले भ्रमण र अभिव्यक्तिको स्वतन्त्रता कुण्ठित हुने कार्य नदोहो्र्‍याउन चेतावनी दिएका छन्। जेन–जी समुहका अगुवाले भने एमाले नेताहरूको आन्दोलनविरोधी टिप्पणीका कारण शान्तिपुर्ण विरोधमा उत्रिएको दाबी गरेका छन् ।

सुरक्षा निकायका अनुसार झडपमा सामान्य चोटपटक बाहेक कुनै पक्राउ भने गरिएको छैन।