महोत्तरी । नेकपा (माओवादी केन्द्र) का संयोजक पुष्पकमल दाहालले राष्ट्र बचाउनु नै अहिलेको मुख्य जिम्मेवारी भएको भन्दै पार्टी अध्यक्षको जिम्मेवारीमा मात्र सीमित रहने सोच नभएको बताएका छन्।

महोत्तरीको रामगोपालपुरमा आयोजित एक कार्यक्रममा बोल्दै दाहालले भने, “अध्यक्ष भएर बस्नुपर्छ भन्ने मेरो सोच होइन। राष्ट्र बचाउनु नै मुख्य हो। आवश्यकता परे म जस्तोसुकै त्याग गर्न तयार छु।”

‘जेनजी’ र माओवादी एक हुनुपर्छ:
संयोजक दाहालले आगामी चुनावी रणनीति स्पष्ट पार्दै ‘जेनजी’ (Gen-Z) युवा र माओवादी मिलेर चुनाव लड्नुपर्ने दाबी गरे।

उनले भने, “अरू शक्तिहरूले जेनजीका माग पूरा गर्दैनन्। माओवादी नै त्यो शक्ति हो, जसले प्रत्यक्ष निर्वाचित कार्यकारी प्रमुख, पूर्ण समानुपातिक निर्वाचन प्रणाली र समावेशी लोकतन्त्रलाई व्यवहारमा ल्याउन सक्छ।”

राष्ट्रिय सहमति र भ्रष्टाचार नियन्त्रण:
देश संकटमा रहेको भन्दै दाहालले राष्ट्रिय सहमतिको खाँचोमा जोड दिए। उनले संविधान निर्माणका बेला राष्ट्रिय सहमति कायम नगरेको भए देश भयानक दुर्घटनामा जाने खतरा रहेको बताए।

उनले सरकारको नेतृत्व गर्दा माओवादीले नै भ्रष्टाचारविरुद्ध अभियान सुरु गरेको र सामाजिक न्यायका मुद्दाहरूमा ठोस काम गरेको दाबी गरे। यद्यपि, उनले केही मिडिया र विदेशी दलालले आफूहरूको बदनाम गर्न खोजेको आरोप लगाए।

निर्वाचन र वामपन्थी एकता:
दाहालले आगामी फागुन २१ गते तोकिएको निर्वाचनलाई लिएर कुनै अन्योल नराख्न आग्रह गर्दै भने, “चुनाव हुन्छ, हुनैपर्छ। यही अहिलेको एक मात्र विकल्प हो।” उनले निर्वाचनको तयारीमा जुट्न सबैलाई आह्वान गरे।

अन्तमा, उनले वामपन्थी एकताको नयाँ अभियान सुरु भएको जानकारी दिँदै समाजवादी मोर्चा बनिसकेको र अब एमालेभित्रका इमानदार देशभक्तहरूसँग पनि एकता गर्ने तयारी भइरहेको बताए। उनले अब माओवादी केन्द्रको नेतृत्वमा नयाँ एकता गरिने दाबी गरे।