काठमाडौं । अभिनेता दयाहाङ राईले आफ्नो नयाँ चलचित्र ‘वरिष्ठ बलराम’ स्थापित (वरिष्ठ) र उदाउँदो (नयाँ) व्यक्तिबीचको प्रतिष्ठा र अस्तित्वको संघर्षको कथा भएको बताएका छन् ।

दयाहाङका अनुसार, आफ्नो इज्जत र साख जोगाइराख्न खोज्ने स्थापित व्यक्ति र उसलाई टक्कर दिँदै आफू स्थापित हुन खोज्ने उदाउँदो व्यक्ति बीचको रोचक कथा नै चलचित्रको मुख्य विषयवस्तु हो । चलचित्रमा दयाहाङ स्थापित ‘वरिष्ठ’ पात्रको भुमिकामा छन् भने उनलाई चुनौती दिने उदाउँदो पात्रको रूपमा विजय बराल छन् ।

मानवीय स्वभावमा ‘वरिष्ठ’ देखिने चाहना
मानिसको भित्री रूप जस्तो भए पनि बाहिरी आवरणमा भने प्रतिष्ठित र वरिष्ठ कहलिन रुचाउने मानवीय स्वभाव चलचित्रले देखाउने दयाहाङ बताउँछन् । “मान्छे जस्तो सुकै होस्, समाजमा ऊ वरिष्ठ र प्रतिष्ठित हुन चाहन्छ, यो मानवीय स्वभाव हो,” दयाहाङ भन्छन्, “यो चलचित्रमा यही कुरा छ । मेरो चरित्र पनि त्यही चाहना बोकेको छ ।”

विजय बरालले पनि ‘वरिष्ठ बलराम’ लाई सामान्य मानिसबाट वरिष्ठ बन्ने चाहना र त्यो सोचबीचको टकराबको कथाको रूपमा व्याख्या गरे । उनले आफू दयाहाङ र अर्का पात्रबीचको टकराबमा ‘बले’ नामक पात्रको रूपमा रहेको बताए । चलचित्रको शीर्षक ‘वरिष्ठ बलराम’ कसको नाम हो भन्ने रहस्य भने ट्रेलर रिलिज वा सिनेमा प्रदर्शनपछि मात्रै खुल्ने उनको भनाइ छ, तर उनलाई ‘बले’ भनेर बोलाइएको जानकारी दिए ।

विजय बरालले सिनियर कलाकार दयाहाङ राईसँग सिनेमाभित्र घम्साघम्सी र टकराबको भूमिका निभाउन केही संकोच भएको अनुभव सुनाए । “दाइ (दयाहाङ) लाई अग्रज र मैले सम्मान गर्ने भएकाले, दाइ के गरौँ, कसरी गरौँ भन्थेँ । दाइले अफ्ठ्यारो नमान्नुस् भनेपछि म गर्थें,” उनले भने ।

तर, दयाहाङ राईले भने सेटमा व्यक्ति नभई चरित्र मुख्य हुने भएकाले को सिनियर र को जुनियर भनेर हेर्न नहुने तर्क राखे । उनले ‘दासढुंगा’मा गुरु अनुप बरालसँग काम गर्दाको अनुभव सम्झँदै भने, “उहाँले चरित्रमा गुरुचेला हुँदैन, भँडास पोख्ने मौका पनि यही हो भन्नुभयो । भँडास पोख्ने भनेर चरित्रभन्दा माथि चाहिँ जानु भएन ।”

नायिका समृद्धि अर्यालले भने आफु सिनेमामा शो पिस (सजावटको वस्तु) मात्र नरहेको दाबी गरेकी छिन् । दुई अग्रज कलाकारको बीचमा आफ्नो पनि इम्प्याक्टफुल (प्रभावशाली) भूमिका रहेको उनको भनाइ छ, जसले मुख्य दुई पात्रलाई प्रभाव पार्ने खालको छ । यो चलचित्रको भूमिकाले आफ्नो सिने करियरमा सहयोग गर्ने विश्वास उनले व्यक्त गरिन् ।

प्रदर्शन मिति र प्राविधिक पक्ष
सुरेन्द्र पौडेलको निर्देशन रहेको चलचित्र ‘वरिष्ठ बलराम’ आगामी कात्तिक ६ गते भाइटीकाको अवसरमा रिलिज हुँदैछ ।

मुख्य कलाकारहरू: दयाहाङ राई, विजय बराल, समृद्धि अर्यालका साथै पशुपति राई, माओत्से गुरुङ, भोलाराज सापकोटा, रामबाबु रेग्मी, प्रदीप कुमार चौधरी (पीके) लगायत छन् ।

निर्देशक: सुरेन्द्र पौडेल (कथा र सम्पादन पनि)
पटकथा: महेश दवाडी
निर्माता: आशिष एच तामाङ र श्रीराज कार्की
ब्यानर: वृषभ सिद्धी इन्टरटेनमेन्टको प्रस्तुतिमा आन्भी फिल्मसको सहकार्य
प्राविधिक पक्ष: मनकृष्ण महर्जन (छायांकन), प्रशान्त शिवाकोटी (संगीत), सम्राट बस्नेत (एक्सन निर्देशन), प्रदीप लामा (नृत्य निर्देशन)
वितरण: काठमाडौं उपत्यकामा डीसीएन र उपत्यका बाहिर कुवेर सिने डिस्ट्रिव्युसनले गर्नेछ ।