तमिलनाडु । भारतको तमिलनाडुमा अभिनेताबाट राजनीतिमा प्रवेश गरेका विजयको चुनावी र्‍यालीमा भागदौड मच्चिँदा कम्तीमा ३१ जनाको मृत्यु भएको छ । घटनामा महिला तथा बालबालिकासहित दर्जनौँ घाइते भएका छन् ।

तमिलनाडुको करुर जिल्लामा शनिवार साँझ आयोजित तमिलगा वेट्री कझगम (टिभीके) पार्टीको विशाल चुनावी सभामा अप्रत्याशित रूपमा भागदौड मच्चिएको थियो । सभामा हजारौँको संख्यामा मानिसहरू उपस्थित थिए । अचानक भीड अनियन्त्रित हुँदा उक्त दुःखद घटना हुन पुगेको भारतीय सञ्चारमाध्यमले जनाएका छन् ।

तमिलनाडु सरकारका पूर्वमन्त्री तथा स्थानीय विधायक सेन्थिल बालाजीले सञ्चारमाध्यमलाई दिएको जानकारीअनुसार घटनामा बालबालिका र महिलासहित ३१ जनाको ज्यान गएको पुष्टि भएको छ । मृतकको संख्या बढ्न सक्ने अनुमान गरिएको छ ।

घटना लगत्तै तमिलनाडुका मुख्यमन्त्री एम.के. स्टालिनले जिल्लामा आपतकालीन प्रोटोकल लागु गर्न निर्देशन दिनुभएको छ । उहाँले घटनालाई “चिन्ताजनक” बताउँदै घाइतेहरूको तत्काल उपचारको व्यवस्था गर्न स्वास्थ्य मन्त्री र जिल्ला अधिकारीलाई निर्देशन दिनुभएको छ ।

यसैबिच, भारतीय प्रधानमन्त्री नरेन्द्र मोदीले घटनाप्रति गहिरो दुःख व्यक्त गर्नुभएको छ । सामाजिक सञ्जालमा उहाँले लेख्नुभएको छ, “तमिलनाडुको करुरमा भएको राजनीतिक र्‍यालीको दुर्भाग्यपूर्ण घटना अत्यन्तै दुःखदायी छ । मेरो समवेदना आफ्ना प्रियजन गुमाएका परिवारहरूप्रति छ । यो कठिन समयमा उनीहरूलाई शक्ति मिलोस् भन्ने कामना गर्दछु र सबै घाइतेहरूको शीघ्र स्वास्थ्य लाभको कामना गर्दछु ।”

घाइतेहरूको करुरस्थित सरकारी अस्पताल र अन्य निजी अस्पतालहरूमा उपचार भइरहेको छ । स्वास्थ्य मन्त्री एम. सुब्रमण्यमले त्रिचीबाट थप स्वास्थ्यकर्मीको टोली करुर पठाइएको र आफु पनि घटनास्थलतर्फ प्रस्थान गरेको जानकारी दिनुभएको छ ।

विपक्षी दल एआईएडीएमकेका महासचिव के. पलानिस्वामीले पनि घटनाप्रति दुःख व्यक्त गर्दै मृतकका परिवारप्रति समवेदना प्रकट गर्नुभएको छ ।

अभिनेता विजयले सेप्टेम्बर २७ मा करुरमा चुनावी प्रचारका क्रममा सभालाई सम्बोधन गरिरहेका थिए । सोही क्रममा भीडमा च्यापिएर धेरै मानिस बेहोस भएका थिए । रिपोर्टका अनुसार, घाइतेहरूलाई करुर सरकारी अस्पतालका साथै एक निजी अस्पतालमा पनि भर्ना गरिएको छ ।