काठमाडौं। अर्थमन्त्री रामेश्वर खनालले आफु पदमा रहुन्जेल व्यक्तिगत सामाजिक सञ्जाल प्रयोग नगर्ने घोषणा गरेका छन् । मन्त्रीका व्यक्तिगत विचार र निर्णयले संस्थागत संरचनालाई ओझेलमा पार्न सक्ने भन्दै उनले यस्तो निर्णय लिएका हुन् ।

यो निर्णयसँगै अब अर्थ मन्त्रालयसँग सम्बन्धित सम्पुर्ण सूचना, सन्देश र घोषणाहरू मन्त्रालयको आधिकारिक सामाजिक सञ्जाल र वेबसाइटमार्फत मात्रै सार्वजनिक गरिनेछ ।

अर्थमन्त्री खनालले राज्यका निकाय र संस्थागत प्रणालीलाई बलियो बनाउने उद्देश्यले यस्तो कदम चालेको बताएका छन्। उनले व्यक्तिगत प्रचारभन्दा संस्थागत जवाफदेहिता र पारदर्शिता महत्वपुर्ण हुनेमा जोड दिए ।

पछिल्लो समय सार्वजनिक पदमा रहेका व्यक्तिहरूले व्यक्तिगत सामाजिक सञ्जालबाटै महत्वपुर्ण घोषणाहरू गर्ने र त्यसले भ्रम तथा विवाद सिर्जना गर्ने गरेको थियो । अर्थमन्त्रीको यो घोषणालाई राज्यको संस्थागत प्रणालीलाई सम्मान गर्ने र सुचना प्रवाहलाई व्यवस्थित बनाउने एक सकारात्मक प्रयासका रूपमा लिइएको छ। उनले हालै देशको आर्थिक अवस्थालाई ध्यानमा राख्दै सरकारी खर्च कटौतीका लागि चालेका कठोर कदमहरूको पनि प्रशंसा भइरहेको छ ।