नेपालको राजधानी उपत्यका लगायत देशै भरी सेप्टेम्बर ८, यता भएको जेन जी पुस्ताका निर्दोष युवाहरूको प्रदर्शनमा भएको गोली प्रहार, हत्या तथा प्रहरीको दुःखद निधन एवं सरकारी भवन, ऎतिसाहिक धरोहर र दस्ताबेज डढाउने, सार्वजनिक र निजी सम्पत्ति ध्वस्त पार्ने, लुटपाट गर्ने र अराजकता फैल्याउने कार्य अत्यन्तै पिडादायी छन्। मुलुकमा संवैधानिक रिक्तता, अनिश्चय र जनधनको क्षतिले राष्ट्रिय सुरक्षा तथा सार्वभौमसत्ता माथि समेत संकट देखा पर्दा मातृभूमिको पिडामा हामी विदेशमा रहेका नेपाली अत्यन्तै चिन्तित छौँ।

देशमा भ्रष्टाचार, कुशासन, पुराना दलका पुरातनि नेतृत्वको अकर्मण्यता, अदुरदर्शिता, नाता र गुटवादलाई पोस्ने कुकर्मले सर्वत्र असन्तुष्टि र निराशा केही वर्ष देखिनै पन्पिदै गइरहेको थियो। जेन जी पुस्ताले अगुवाइ गरे, आवाज उठाए, र अब अति भो भनेर सडक प्रदर्शनमा आए। राजनीतिक पुरानो एउटा पुस्ताले घुँडा टेक्यो, सबैलाई सबक हो त्यो।

अब अवस्था बदल्न सुबिचारित ढंगले अघि बढ्नु पर्नेमा अवसरवादी, घुस पैठिया र अपराधीले जेन जी को उत्कट चाहाना र बहानामा खेल्न लुटपाट, आगजनी, अपराधीलाई जेलबाट भगाउने, मन नपरेका मान्छे र घर, व्यवसाय तथा संरचना माथि धावा बोल्ने गैर कानुनी कार्यलाई पुरुषार्थ प्रचार गरी जेन जी र नेपालीको भावना र उद्देश्य लाई बदनाम गर्ने र प्राप्त उपलब्धिलाई ओझेलमा पारी देसलाई अझ कमजोर र लथालिङ्ग बनाउने तत्वले कुचेष्टा गरेको देखिन्छ । आन्दोलनकारी, सुरक्षा निकायहरू, र आम नागरिक सचेत भई यथाशक्य छिटो नागरिक सर्वोच्चता सहितको बेदाग, इमानदार, योग्यता र अनुभवी नेपाली नागरिकहरूको अन्तरिम सरकारको टिम बनाएर शान्तिपुर्ण र संवैधानिक तरिकाबाटै नयाँ नेपालको शासन पद्धति , पुननिर्माण, हिजो बदमासी गर्नेहरूलाई कारबाही गर्ने, संविधान र कानुनका अगतिला कुरा सुधार गर्दै सुव्यवस्था ल्याउन आन्दोलनरत जेन जी समूह, राष्ट्रपति , न्यायालय, दलहरू, संचार क्षेत्र, नागरिक समाज कृयाशिल हुनुपर्छ । साथै देश भित्रैका बदमास, आपराधिक तत्व र नेपालको हित नचाहने वाह्य तत्वले नेपालीलाई खेलाउने र कमजोर पार्न खोज्ने षडयन्त्र चिर्न सक्षम हुन सक्नु पर्दछ। देश नेपालीले नै बनाउने हो र नेपाली ढले पनि उठ्न र प्रगति गर्न सक्छ भन्ने प्रमाणित गर्ने संगिन यस घडीमा चनाखो र सुझबुझका साथ अघि बढ्न सम्बद्ध सबैलाई आह्वान गर्दछौँ।

युएस नेपाल पोलिसी रिसर्च सेन्टर
अमेरिका,  सेप्टेम्बर १०, २०२५