काठमाडौं । जेन–जी आन्दोलनका क्रममा ज्यान गुमाउनेको संख्या ३४ पुगेको छ । स्वास्थ्य मन्त्रालयले दिएको तथ्याङ्कअनुसार देशभरका विभिन्न अस्पतालमा उपचारका क्रममा यी युवाहरूले ज्यान गुमाएका हुन् ।

यो तथ्याङ्कसँगै देशभर शोकको वातावरण फैलिएको छ । परिवारहरूले आफ्ना छोराछोरी, दाजुभाइ, दिदीबहिनी गुमाएको पीडा सहन नसक्ने अवस्थामा छन् । उपचारका लागि अस्पताल पुग्दा शव झिकेर ल्याउनु परेको अवस्थाले आमनागरिकलाई भावुक बनाएको छ ।

देशभर १ हजार ३६८ जना घाइते भएका छन् । तीमध्ये ३२१ जना अझै उपचाररत छन् भने ९४९ जना डिस्चार्ज भइसकेका छन् । तर घाइतेमध्ये धेरै गम्भीर अवस्थामा रहेका कारण मृतकको संख्या अझै बढ्न सक्ने चिन्ता परिवार र चिकित्सक दुवैमा छ ।

मृतकहरूको विवरण अनुसारः
राष्ट्रिय ट्रमा सेन्टर – ८ जना
सिभिल अस्पताल – ६ जना
भेरी अस्पताल – ५ जना
एभरेस्ट अस्पताल – ३ जना
फ्रन्टलाइन अस्पताल – ३ जना
केएमसी अस्पताल – २ जना
त्रिवि शिक्षण अस्पताल – १ जना
बयोधा अस्पताल – २ जना
बीपी कोइराला स्वास्थ्य विज्ञान प्रतिष्ठान – २ जना
बीएनसी अस्पताल – १ जना
बिर्तासिटी अस्पताल – १ जना

यी संख्याले आन्दोलन कति हिंस्रक र पीडादायी बन्दै गएको छ भन्ने स्पष्ट देखाउँछ।

काठमाडौंको त्रिपुरेश्वरमा आफ्ना छोराको शव बुझ्न आएकी आमा रोइरहेको दृश्यले सबैलाई मुटु पोल्ने बनाएको छ । धेरै परिवार अझै अस्पताल चहारिरहेका छन्—कसैले घाइते छोराछोरीलाई सघाइरहेका छन्, कसैले शव बुझ्ने पालो पर्खिरहेका छन् ।

जेन–जी आन्दोलनले नयाँ राजनीतिक दिशा खोजिरहेको भए पनि यसको मुल्य निरपराध जनताले ज्यान गुमाएर चुकाइरहेका छन् । मृतकको परिवार मात्रै होइन, सारा समाज नै पीडामा डुबेको छ ।