काठमाडौं । समावेशिता, समानता र लोकतन्त्रको सुदृढ भविष्यका लागि दशकौँदेखि निरन्तर सङ्घर्ष गर्दै आएका लैङ्गिक तथा यौनिक अल्पसङ्ख्यक समुदाय फागुन २१ गते हुन लागेको प्रतिनिधिसभा निर्वाचनमा सक्रिय रूपमा होमिएका छन् ।

समावेशी समाजवादी पार्टीले प्रत्यक्षतर्फ ६ जना र समानुपातिकतर्फ १५ जनालाई उम्मेदवार बनाएको छ । पार्टीले देशभरका १६५ निर्वाचन क्षेत्रमध्ये ६ वटा निर्वाचन क्षेत्रमा लैङ्गिक तथा यौनिक अल्पसङ्ख्यक समुदायका उम्मेदवार रहेका कारण ती क्षेत्रहरूमा सर्वसम्मत निर्वाचित गराइदिन सार्वजनिक अपिलसमेत गरेको छ ।

सामाजिक न्याय, समावेशी लोकतन्त्र तथा लैङ्गिक तथा यौनिक अल्पसङ्ख्यक समुदायको मानवअधिकारको क्षेत्रमा लामो समयदेखि सक्रिय रहँदै आएका व्यक्तिहरू यसपटक प्रत्यक्ष निर्वाचनमा सहभागी भएका छन् ।

काठमाडौं–१ बाट दक्षिण एसियामै पहिलो समलिङ्गी विवाह दर्ता गराउन सफल सुरेन्द्र पाण्डे, काठमाडौं–१० बाट लोकदोहोरी गायक पूर्णचन्द्र पौडेल, मोरङ–४ बाट नुमा लिम्बु (चञ्चला), रुपन्देही–२ बाट देवेन्द्रबहादुर खत्री (मधु), ओखलढुङ्गाबाट पिंकी राई र काभ्रेपलान्चोक–१ बाट विनोद लामा (कोनिका) प्रत्यक्षतर्फका उम्मेदवार हुन् ।

उनीहरूले राजनीति क्षेत्रमा सधैँ आवाजविहीन र सीमान्तकृत बनाइएका समुदायको प्रतिनिधित्व गर्ने स्पष्ट उद्देश्यसहित उम्मेदवारी दिएको बताएका छन् । कानुन निर्माण हुने थलो संसदमा पुगेर मात्रै सीमान्तकृत समुदायका वास्तविक मुद्दाहरूलाई संस्थागत गर्न सकिने विगतको अनुभवले देखाइसकेको उनीहरूको भनाइ छ ।

उनीहरूले पहिलो संविधान सभामा सुनिल बाबु पन्तको प्रतिनिधित्व भएकै कारण संविधानमा लैङ्गिक तथा यौनिक अल्पसङ्ख्यक समुदायका अधिकार सुनिश्चित भएको स्मरण गराउँदै अब ती अधिकारलाई व्यवहारिक रूपमा कार्यान्वयन गराउन पुनः समुदायको प्रतिनिधित्व संसदमा हुनु अनिवार्य रहेको उल्लेख गरेका छन् ।

देशको लोकतान्त्रिक अभ्यास अझ समावेशी, उत्तरदायी र न्यायपूर्ण बन्न आवश्यक रहेको उनीहरूको ठम्याइ छ। सबै वर्ग, समुदाय र पहिचानको समान सहभागिता बिना लोकतन्त्र अपूरो रहने उनीहरूको भनाइ छ । मानवअधिकार, समान अवसर, सामाजिक न्याय र समावेशी नीतिनिर्माण आफ्नो प्रमुख एजेन्डा रहेको उनीहरूले सार्वजनिक गरेका छन् । लामो समयदेखि भेदभाव, बहिष्कार र अपमान सहँदै आएको समुदायका मुद्दाहरूलाई कानुनी र संस्थागत रूपमा स्थापित गर्न संसदभित्रको भूमिका निर्णायक हुने उनीहरूको विश्वास छ ।

आफ्नो राजनीतिक यात्रामा साथ, समर्थन र विश्वास प्रदान गर्दै आएका नागरिक, अधिकारकर्मी, युवा, महिला तथा अल्पसङ्ख्यक समुदायप्रति आभार व्यक्त गर्दै उनीहरूले आगामी दिनमा पनि सहयोग र समर्थनको अपेक्षा गरेका छन् ।

समावेशी राजनीति र सामाजिक परिवर्तनमा विश्वास राख्ने सबै नागरिकलाई आफ्नो उम्मेदवारीबारे सन्देश साझा गर्दै हौसला प्रदान गर्नसमेत उनीहरूले आग्रह गरेका छन् । उनीहरूको उम्मेदवारीलाई सामाजिक न्याय, समावेशी प्रतिनिधित्व र लोकतान्त्रिक अभ्यासलाई थप मजबुत बनाउने महत्त्वपूर्ण पहलका रूपमा हेरिएको छ ।