कोलोराडो । अमेरिकी राष्ट्रपति डोनाल्ड ट्रम्प नेतृत्वको प्रशासनले अमेरिकाको स्थायी बसोबास अनुमति (ग्रिन कार्ड) का लागि आवेदन दिने केही विदेशी नागरिकबाट एक लाख अमेरिकी डलर आजको बिनिमय दर अनुसार(US$1 = Rs 153.86) करिब १ करोड त्रिपन्न लाख ८६ हजार नेपाली रुपैयाँ) सम्मको अग्रिम धरौटी (बन्ड) लिन सक्ने प्रस्तावमाथि विचार गरिरहेको छ ।

द वाल स्ट्रिट जर्नलका अनुसार अमेरिकी विदेश मन्त्रालयले यो प्रस्तावको समीक्षा गरिरहेको छ । ट्रम्प प्रशासनले आर्थिक रूपमा आत्मनिर्भर हुन नसक्ने आप्रवासीको संख्या घटाउने नीति अन्तर्गत यस्तो व्यवस्था ल्याउने तयारी गरेको हो ।

प्रस्तावअनुसार अमेरिकाबाहिरबाट स्थायी आप्रवासी भिसा (इमिग्रेन्ट भिसा) का लागि आवेदन दिने व्यक्तिले ठुलो रकम धरौटीका रूपमा बुझाउनुपर्नेछ । केही अधिकारीहरूले यो रकम एक लाख अमेरिकी डलरसम्म हुन सक्ने बताएका छन् । यद्यपि, सबै आवेदकका लागि एउटै रकम लागु नहुन सक्ने र व्यक्तिअनुसार फरक हुन सक्ने जनाइएको छ ।

समाचारअनुसार यो नीति सुरुमा सीमित संख्याका देशहरूमा परीक्षण (पाइलट) का रूपमा लागु गर्ने सम्भावनाबारे पनि छलफल भइरहेको छ ।

यदि प्रस्ताव कार्यान्वयनमा आयो भने आवेदकले आवेदनका बेला धरौटी रकम बुझाउनुपर्नेछ । पछि उनीहरूले अमेरिकी नागरिकता प्राप्त गरेपछि उक्त रकम फिर्ता पाउनेछन् । अमेरिकामा नागरिकता प्राप्त गर्न सामान्यतया ५ वर्ष लाग्ने भएकाले धरौटी रकम लामो समयसम्म सरकारसँग रहनेछ ।

अमेरिकी विदेश मन्त्रालयका प्रवक्ता टोमी पिगोटले राष्ट्रपति ट्रम्पले अमेरिकामा बसाइँ सर्न चाहने व्यक्तिहरू आर्थिक रूपमा आत्मनिर्भर हुनुपर्ने स्पष्ट नीति लिएको बताएका छन् । उनका अनुसार केही भिसा आवेदकलाई आवश्यक आर्थिक स्रोत रहेको प्रमाणित गर्न धरौटी राख्नुपर्ने व्यवस्था गर्ने विषयमा मन्त्रालयले अध्ययन गरिरहेको छ ।

प्रस्तावित धरौटी प्रणालीको उद्देश्य अमेरिकामा आएपछि सरकारी सहायता वा सामाजिक सेवामा निर्भर हुन सक्ने जोखिम कम गर्नु रहेको बताइएको छ । यदि कुनै ग्रिन कार्डधारक आर्थिक रूपमा आत्मनिर्भर हुन नसकेमा उक्त धरौटीलाई सुरक्षा (कोलाटेरल) का रूपमा प्रयोग गर्न सकिने अवधारणासमेत अघि सारिएको छ ।

विश्लेषकहरूका अनुसार यस्तो उच्च धरौटीले विशेष गरी न्युन आय भएका देशका नागरिकलाई ग्रिन कार्डका लागि आवेदन दिन कठिन बनाउनेछ । राम्रो रोजगारी र आम्दानीको खोजीमा अमेरिका जान चाहने धेरै आवेदकका लागि यति ठुलो रकम जुटाउन चुनौतीपुर्ण हुने अनुमान गरिएको छ ।

अमेरिकामा ग्रिन कार्ड प्रायः अमेरिकी नागरिकका श्रीमान्–श्रीमती, बाबुआमा, दाजुभाइ–दिदीबहिनी लगायतका पारिवारिक सदस्यलाई प्रदान गरिने स्थायी आप्रवासी भिसामार्फत उपलब्ध गराइन्छ। गत वर्ष मात्रै अमेरिकी प्रशासनले करिब ५ लाख स्थायी आप्रवासी भिसा जारी गरेको थियो ।

हालसम्म यो प्रस्ताव अन्तिम निर्णयमा पुगेको छैन । विदेश मन्त्रालयले यसको कानुनी, प्रशासनिक तथा व्यावहारिक पक्षबारे समीक्षा गरिरहेको जनाएको छ ।