डेनभर । अमेरिकी सर्वोच्च अदालतले राष्ट्रपति डोनाल्ड ट्रम्प प्रशासनले मेल–इन मतपत्रसम्बन्धी नियममा परिवर्तन गर्न अघि सारेको प्रस्तावलाई कार्यान्वयन हुनबाट रोकेको छ। अदालतको निर्णयसँगै कोलोराडोमा हाल सञ्चालनमा रहेको मेल–इन मतदान प्रक्रिया कायम रहने भएको छ।

प्रस्तावित व्यवस्थाअनुसार राज्यहरूले मेल–इन मतपत्रका लागि निश्चित प्रकारको खाम प्रयोग गर्नुपर्ने, विशेष बारकोड राख्नुपर्ने तथा योग्य मतदाताको सूची अमेरिकी हुलाक सेवा (USPS) को अनलाइन प्रणालीमा पठाउनुपर्ने व्यवस्था गरिएको थियो। मापदण्ड पूरा नगरेका मतपत्रको वितरण रोक्न सक्ने अधिकार हुलाक सेवालाई दिने प्रस्ताव पनि थियो।

कोलोराडोका निर्वाचन अधिकारीहरूले छोटो समयमै यस्तो प्रणाली कार्यान्वयन गर्न प्राविधिक र प्रशासनिक चुनौती हुने बताएका थिए। कोलोराडो काउन्टी क्लर्क्स एसोसिएसनका कार्यकारी निर्देशक म्याट क्रेनका अनुसार प्रस्तावित प्रणाली निर्वाचनअघि पूर्ण रूपमा तयार हुने अवस्था थिएन।

राष्ट्रपति ट्रम्पले गैर नागरिकबाट मेल–इन मतदान हुन सक्ने अवस्थालाई रोक्न नयाँ व्यवस्था आवश्यक रहेको बताउँदै आएका छन्। तर क्रेनले कोलोराडोमा गैर नागरिकले मतदान गर्ने घटना अत्यन्तै दुर्लभ रहेको बताएका छन्।

कोलोराडोकी सेक्रेटरी अफ स्टेट जेना ग्रिसवल्डले सर्वोच्च अदालतको निर्णयपछि राज्यमा निर्वाचनसम्बन्धी हालको व्यवस्था निरन्तर रहने बताएकी छन्। उनका अनुसार मतदाता योग्यताको निर्धारण राज्यको निर्वाचन प्रक्रियाअन्तर्गत हुने विषय हो।

कोलोराडोमा दर्ता भएका मतदातालाई आगामी मध्यावधि निर्वाचनका लागि मेल–इन मतपत्र स्वचालित रूपमा पठाइनेछ। निर्वाचन अधिकारीहरूका अनुसार मतपत्र पठाउने प्रक्रिया अक्टोबर लागेपछि सुरु हुनेछ ।