लस एन्जलस (क्यालिफोर्निया) — घरेलु मैदानमा आयोजना भइरहेको फिफा विश्वकप २०२६ मा संयुक्त राज्य अमेरिकाले विजयी सुरुवात गरेको छ। समूह ‘डी’ अन्तर्गत शुक्रवार राति लस एन्जलसस्थित सोफाइ स्टेडियममा भएको आफ्नो पहिलो खेलमा अमेरिकाले पाराग्वेलाई ४–१ गोलअन्तरले पराजित गर्दै प्रतियोगितामा बलियो उपस्थिति जनाएको हो।

३२ वर्षपछि आफ्नै भूमिमा विश्वकप खेलिरहेको अमेरिकी टोलीले समर्थकहरूको व्यापक साथ पाउँदै खेलको सुरुदेखि नै आक्रामक प्रदर्शन गरेको थियो। स्ट्राइकर फोलारिन बालोगनले दुई गोल गर्दै टोलीको जितमा महत्वपूर्ण योगदान दिए भने कप्तान क्रिस्टियन पुलिसिकले खेल निर्माणमा उत्कृष्ट भूमिका निभाए।

अमेरिकाले खेलको सातौँ मिनेटमै अग्रता लिएको थियो। पुलिसिकको सटिक पासमा वेस्टन म्याकेनीले दिएको क्रस पाराग्वेका मिडफिल्डर डामियान बोबाडिलाको खुट्टामा लागेर आफ्नै पोस्टमा प्रवेश गरेपछि अमेरिकाले १–० को अग्रता बनाएको थियो।

पहिलो गोलपछि थप आत्मविश्वासी बनेको अमेरिकी टोलीले ३१औँ मिनेटमा अग्रता दोब्बर बनायो। पुलिसिकको उत्कृष्ट मुभबाट सिर्जना भएको अवसरलाई फोलारिन बालोगनले गोलमा परिणत गर्दै टोलीलाई २–० को अवस्थामा पुर्‍याए।

पहिलो हाफको इन्जुरी समयमा अमेरिकाले अर्को गोल थप्यो। मलिक टिलम्यानको लामो तथा सटिक पासलाई नियन्त्रणमा लिएर बालोगनले बक्सभित्रबाट गरेको शक्तिशाली प्रहार गोलमा परिणत भएपछि अमेरिका पहिलो हाफमै ३–० ले अगाडि रह्यो। विश्वकप इतिहासमा अमेरिकाले पहिलो हाफमा बनाएको यो सबैभन्दा ठुलो अग्रता हो।

दोस्रो हाफमा पाराग्वेले केही सुधारिएको प्रदर्शन गर्दै खेलमा फर्कने प्रयास गर्‍यो। ७२औँ मिनेटमा माउरिसियोले गोल गर्दै अन्तर ३–१ मा झारे पनि त्यसले खेलको नतिजा परिवर्तन गर्न सकेन।

खेलको अन्तिम समयमा मैदान प्रवेश गरेका जियो रेयनाले इन्जुरी समयको सातौँ मिनेटमा आकर्षक व्यक्तिगत प्रयासमार्फत चौथो गोल थपे। उनको उत्कृष्ट ड्रिब्लिङ र फिनिसिङले अमेरिकाको ४–१ को शानदार जित सुनिश्चित गर्‍यो।

यस खेलमा कप्तान क्रिस्टियन पुलिसिकले दुई गोलका अवसर सिर्जना गर्दै टोलीको आक्रमणलाई प्रभावकारी बनाएका थिए। तर पहिलो हाफमा बायाँ खुट्टाको पिँडौलामा सामान्य चोट लागेपछि उनी दोस्रो हाफमा मैदान फर्केनन्। उनको स्थानमा सेबास्टियन बरहाल्टर मैदान प्रवेश गरेका थिए। खेलपछि पुलिसिकले आफ्नो चोट गम्भीर नभएको र आगामी खेलका लागि आफू आशावादी रहेको बताएका छन्।

यसैबिच, अमेरिकी टोलीका अनुभवी डिफेन्डर तथा कप्तान टिम रिमले नयाँ इतिहास रचेका छन्। ३८ वर्ष २५० दिनको उमेरमा मैदान उत्रिएका उनी विश्वकप इतिहासमा अमेरिकाका लागि खेल्ने सबैभन्दा बढी उमेरका खेलाडी बनेका छन्।

सन् २०२४ मा अमेरिकी टोलीको मुख्य प्रशिक्षक बनेका माउरिसियो पोचेटिनोका लागि पनि विश्वकपको पहिलो खेल स्मरणीय रह्यो। उनको नेतृत्वमा अमेरिकाले घरेलु समर्थकमाझ प्रभावशाली जित निकाल्दै उपाधि यात्राको सकारात्मक सुरुवात गरेको छ।

यो जितसँगै अमेरिकाले समूह ‘डी’ मा महत्वपूर्ण तीन अंक जोडेको छ। अब अमेरिकाले जुन १९ मा सिएटल स्टेडियममा अस्ट्रेलियासँग खेल्नेछ भने जुन २५ मा लस एन्जलस स्टेडियममा टर्कीसँग समूह चरणको अन्तिम खेल खेल्ने तालिका रहेको छ।

घरेलु मैदानको दबाबलाई अवसरमा बदल्दै अमेरिकाले विश्वकप २०२६ मा आफ्नो अभियान उत्साहजनक ढंगले सुरु गरेको छ। अब टोलीले आगामी खेलहरूमा पनि यही लय कायम राख्न सके उपाधि दाबेदारका रूपमा थप बलियो सन्देश दिन सक्नेछ।