मुम्बई । दीपिका पादुकोनले हलिउड वाक अफ फेममा तारा अर्थात् स्टार पाउने पहिलो भारतीय अभिनेत्री बनिन । यसले उनलाई विश्वभरिका मनोरञ्जन जगतका प्रमुख सिताराहरूको सूचीमा स्थापित गर्‍यो ।

यो खबर ओभेसन हलिउडमा भएको प्रेस कान्फ्रेन्समा सार्वजनिक गरिएको थियो, जहाँ २०२६ का सम्मानित व्यक्तिहरूको घोषणा गरियो । दीपिकालाई एमिली ब्लन्ट, टिमोथी चालामेट, रामी मालेक, स्ट्यान्ली टुची, माइली साइरस, गर्डन रामसे र रेचल म्याकएडम्स जस्ता अन्तर्राष्ट्रिय सिताराहरूसँगै सम्मानित गरिनेछ ।

के हो हलिउड वाक अफ फेम?
हलिउडको प्रसिद्ध पैदल मार्गमा राखिने स्टार हो । यो चलचित्र, टेलिभिजन, संगीत, रेडियो र थिएटर जगतका प्रतिभाहरूलाई सम्मान गर्न दिइन्छ । साथै यो १९६० देखि यो परम्परा चलिआएको छ भने अहिलेसम्म २,७०० भन्दा बढी ताराहरू राखिएका छन् ।

दीपिका यो सम्मान पाउने पहिलो भारतीय अभिनेत्री हुन् । यसअघि १९६० मा साबु दस्तागीर (चलचित्र ‘एलिफेन्ट ब्वाइ’का कलाकार) र २०२३ मा मिन्डी कालिङले यस्तै सम्मान पाएका थिए ।

दीपिकाले आफ्नो इन्स्टाग्राममा यस उपलब्धिलाई “धन्यवाद…” भनेर स्वागत गरिन् । उनको यो सफलताले भारतीय सिनेमाको विश्वव्यापी पहुँचलाई फेरि एक पटक प्रमाणित गर्‍यो ।