कलकत्ता । जैशिदेवल युथ क्लबद्वारा सञ्चालित जैशिदेवल तेक्वान्दो डोजाङ्गका ९ खेलाडीहरूले भारतको कोलकातास्थित बिस्वा बाङ्ला कन्भेन्सन सेन्टर, न्युटाउनमा २०२५ डिसेम्बर २१ देखि २३ गतेसम्म आयोजित “द ९औँ इन्डिया टीआईए ओपन अन्तर्राष्ट्रिय तेक्वान्दो च्याम्पियनसिप–२०२५” मा सहभागिता जनाउँदै नेपालका लागि ९ स्वर्ण, १ रजत र १ काँस्य गरी जम्मा ११ अन्तर्राष्ट्रिय पदक जित्न सफल भएका छन्। यस उपलब्धिले अन्तर्राष्ट्रिय मञ्चमा नेपालको नाम उच्च राखेको छ ।

पुम्से विधातर्फ रोजेन प्रजापति र मुविक्क्षा गजुरेलले स्वर्ण तथा वितिशा तामाङले रजत पदक जिते। त्यस्तै, ग्योरोगी विधातर्फ अभिमन्यु गजुरेल, वितिशा तामाङ, यमुना जर्गा मगर, अनमोल थापा मगर, सुप्रिया जोशी, राजीव गुरुङ र मुविक्क्षा गजुरेलले स्वर्ण पदक जित्दा राहुल हाङ लिम्बुले काँस्य पदक प्राप्त गरे। यस प्रतियोगितामा मुविक्क्षा गजुरेलले दुई स्वर्ण पदक जितेर विशेष सफलता हासिल गरिन्।

प्रतियोगितामा आयोजक राष्ट्र भारतसहित नेपाल र अन्य देशका गरी करिब ६९० खेलाडीहरूले विभिन्न विधामा प्रतिस्पर्धा गरेका थिए।

जैशिदेवल युथ क्लबका अध्यक्ष तथा जैशिदेवल तेक्वान्दो डोजाङ्गका प्रमुख राजेश प्रजापतिको नेतृत्वमा ९ खेलाडी र ४ जना अफिसियल सहभागी थिए। टिम प्रशिक्षकका रूपमा अन्जीत राई, टिम प्रवन्धक भरत कारन्जित र टिम संयोजक संजय ध्वज जोशी रहेका थिए। प्रतियोगितामा सहभागिताका लागि आवश्यक सम्पुर्ण खर्च क्लबले नै व्यहोरेको जनाइएको छ।