डेनभर । पछिल्ला केही वर्षयता, डेन्भर नगेट्स (Denver Nuggets) र कोलोराडो एभालान्चे (Colorado Avalanche) आफ्ना-आफ्ना खेल लिगमा लगातार च्याम्पियनसिपका दाबेदार बन्दै आएका छन् ।

यो वर्ष पनि स्थिति फरक देखिँदैन । तर यो पटक डेनभर ब्रङ्कोज (Denver Broncos) को उल्लेखनीय सुधारका कारण, कोलोराडोका खेल प्रेमीहरूलाई एउटै वर्षमा तीन वटा ठुला उपाधि जित्ने दुर्लभ अवसर मिल्न सक्छ ।

डेनभर ब्रङ्कोज (Denver Broncos)
तीन टिममध्ये अनुभवका हिसाबले सबैभन्दा नयाँ ब्रङ्कोज यस सिजन सबैभन्दा अघि बढेको टोली हो, जसले उनलाई बलियो प्रतिस्पर्धी बनाएको छ । डेनभर ब्रङ्कोजले केवल राम्रो सुरुवात गरेका छैनन्, उनीहरू अहिले एनएफएलको शीर्ष टोलीहरूमध्ये एक बनेका छन्। अहिलेको अवस्थामा उनीहरूको रेकर्ड ८–२ छ, जुन लिगको उत्कृष्ट प्रदर्शनमध्ये पर्छ, यद्यपि बाँकी खेलहरू चुनौतीपुर्ण हुने देखिन्छ ।

केही मुख्य खेलाडीहरू घाइते भएर बाहिर भए पनि, सिजनको अन्त्यतिर ती फर्कने अपेक्षा गरिएको छ। यदि युवा टोलीले अनुभवका साथ अन्त्यसम्म लय कायम राख्न सके, तिनीहरू सुपर बाउल जित्ने गम्भीर दाबेदार बन्न सक्छन् ।

डेनभर ब्रङ्कोजले प्रत्येक हप्ता मैदानमा आफ्नो जुझारुपन देखाइरहेका छन् — जुन तथ्यांकमा देखिँदैन तर जित्नका लागि निर्णायक बन्न सक्छ। योजनाबद्ध रणनीति महत्त्वपुर्ण हुन्छ, तर कहिलेकाहीँ जित त्यही टोलीको हुन्छ जसको ‘जित्ने चाहना’ बढी हुन्छ ।

कोलोराडो एभालान्चे (Colorado Avalanche)
यदि हामी २०१५ मा ब्रङ्कोजको सुपर बाउल जितलाई प्रारम्भिक बिन्दु मान्यौँ भने, एभालान्चेले २०२२ मा पहिलो उपाधि जित्यो — २००१ पछि २१ वर्षपछि पुनः स्ट्यान्ली कप जित्दै । २०२२ पछि पनि एभालान्चे लगातार बलियो प्रतिद्वन्द्वी रहँदै आएको छ र यो सिजन फेरि अर्को उपाधिको तयारीमा देखिन्छ ।

हाल उनीहरू १०–१–५ को रेकर्डसहित २५ अङ्कका साथ NHL को शीर्ष स्थानमा छन् । पाँच वटा खेल ओभर टाइममा हार्नुको अर्थ हो — एभालान्चेलाई हराउन विपक्षीले अतिरिक्त समयसम्म संघर्ष गर्नै पर्छ ।

यस सिजन टिमले केही नयाँ खेलाडी थपेको छ जसले स्टारहरूमा निर्भरता घटाएको छ। तर स्टारहरू अझै पनि उत्कृष्ट प्रदर्शन गरिरहेका छन् ।
नाथन म्याककिननले १४ गोलका साथ NHL मा अग्रता लिएका छन् र १५ अशिष्टसहित कुल २९ अंकमा लिगका शीर्ष स्कोरर बनेका छन् । उनी फेरि MVP को दौडमा छन् ।

उनीसँगै केल माकार पनि उत्कृष्ट प्रदर्शनमा छन् — NHL का डिफेन्डरहरूमध्ये सबैभन्दा बढी अशिष्ट (१६) र ६ गोलसहित शीर्ष स्थानमा छन् ।
एभालान्चे अहिले स्ट्यान्ली कप जित्ने शीर्ष दाबेदार मध्ये पर्छ र गत हप्ता उनले अर्का बलिया प्रतिद्वन्द्वी एडमोन्टन ऑइलर्सलाई ९–१ ले हराएका थिए ।

डेनभर नगेट्स (Denver Nuggets)
डेनभर नगेट्सले सन् २०२३ मा आफ्नो इतिहासकै पहिलो NBA च्याम्पियनसिप जिते । टोलीसँग अहिले पनि विश्वका उत्कृष्ट खेलाडीमध्ये एक, निकोला जोकीच, छन् — जसको उपस्थितिमा नगेट्स सधैँ उपाधिका लागि दौडमा रहन्छ ।

यो सिजन नगेट्सले केही रणनीतिक परिवर्तन गरेका छन् । स्टार माइकल पोर्टर जुनियरलाई क्याम जोन्सनसँग साटेर टोलीमा गहिराइ थपेका छन्। यस कदमले क्लबलाई नयाँ खेलाडीहरू ल्याउन आर्थिक लचिलोपन पनि दिएको छ। हाल डेनभर नगेट्स पश्चिमी सम्मेलनमा तेस्रो स्थानमा छन् र अर्को खेल जिते भने दोस्रो स्थानमा पुग्ने सम्भावना छ ।

जोकीच सामान्यझैँ सबै प्रमुख सांख्यिक सुचकहरूमा शीर्षमा छन् । एरन गोर्डन जबरजस्त प्रदर्शन गर्दै छन्, जमाल मरे घाइते अवस्थाबाट फर्किएर राम्रो फर्ममा छन्, र टोलीको समग्र संयोजन बलियो देखिन्छ । गत वर्षको जस्तै, यस पटक पनि नगेट्सलाई ओक्लाहोमा सिटी थन्डरलाई हराउन सक्ने प्रमुख टोलीको रूपमा हेरिएको छ ।

कोलोराडोका खेल प्रेमीका लागि ‘सुनौलो’ समय
च्याम्पियनसिप जित्न कुनै पनि खेलमा अत्यन्त कठिन हुन्छ — र प्रत्येक वर्ष केवल एउटा टोली मात्र शीर्षमा पुग्छ । तर अहिले कोलोराडोमा तीन वटा टोली (नगेट्स, एभालेन्च, र ब्रङ्कोज) एकसाथ आफ्नो-आफ्नो लिगको उपाधि जित्ने बलियो दाबेदार बनेका छन् । कोलोराडोका खेल प्रेमीका लागि यो वास्तवमै ‘सुनौलो समय’ हो ।